平改坡，真败家

　　摘要：白云区打算使15亿搞“平改坡”工程，噉“平改坡”系乜东东呢？

　　广是广非□兰心(荔湾海龙街)

　　白云区打算使15亿搞“平改坡”工程，噉“平改坡”系乜东东呢？

　　原来“平改坡”嘅意思就系喺平房嘅平顶上面，加个金字塔嘅瓦屋顶。咁样啲外宾喺飞机上面望落嚟，就会睇到一片凹凸有致嘅景象。据讲咁样搞完之后，就可以显示我哋广州嘅良好面貌。

　　唉！广州嘅良好面貌，唔通穿衣戴帽都重未可以搞得好咩？使唔使要搞到上屋顶啊？当然，咁样搞完之后，可能真系从飞机上面望落嚟会好好睇。不过，你唔喺飞机上面提示下，估计都无乜人会特别留意到地上有啲咁嘢睇啦！噉即是话，15亿搞出来嘅“平改坡”工程，重要买通航空公司先可以达到宣传效果。咁周折，不如直接系啲屋顶上面铺啲有人民币图案嘅瓷砖好过啦！

　　为咗搞面子工程，有啲部门都算得上系“洗脚唔抹脚”，有几多甩几多。大喇喇15亿唔容易搵，咁样使出去算唔算败家呢？当然，以后或者有机会收返嚟嘅！只要喺呢个工程附近搞部直升机，方便啲唔系成日有机会坐飞机嘅市民坐上去俯瞰一下，我谂收返几十蚊一个人，十年八载之后都可以收返一两亿呱！